ԻՆՉՈՎ ԿԵՐԱԿՐԵԼ ԹՌՉՈՒՆՆԵՐԻՆ
Ձմեռը ամենադժվար շրջանն է թռչունների համար: Ցածր ջերմաստիճանը, ուտելիքի դժվար
հայթայթումը, կարճ օրերը հիմնական անբարենպաստ գործոններն են նրանց
կենսագործունեության համար: Ձմռանը թռչուններին կերակրելով`մենք ի զորու ենք
զգալիորեն հեշտացնել նրանց կյանքը: Կարևոր է հիշել, որ եթե նրանց կերակրելու
պատասխանատվություն եք վերցրել, ապա դա պետք է անեք կանոնավոր, կուտը սպառվելուն
պես: Հակառակ դեպքում կերակրելուն սովոր փետրավորները կարող են ոչնչանալ: Կերակրեք
թռչուններին, և նրանք խստաշունչ ձմեռային օրերին կուրախացնեն ձեզ իրենց ուրախ
ճռվողյունով:
Կարելի է կերակրել բոլոր տեսակի թռչուններին: Կարելի է դրան
պատրաստվել դեռ ամառվանից` պատրաստելով ուտելիքը: Երբեմն բավական է միայն դուրս
չնետել այն, ինչ մեզ պետք չէ: Ձմերուկ և սեխ ուտելուց հետո հավաքեք և չորացրեք
սերմերը, և երաշտահավերը ձմռանը հաճույքով կուտեն դրանք: Նրանց կարելի է կերակրել
նաև արևածաղկի, դդումի (բոված) սերմերով, կանեփով, անալի ճարպի և մսի կտորներով,
տարբեր յուղերով` մարգարին, կարագ և այլն: Պատուհանին ամրացված կեռիկից կախված հին
ցանցապարկի մեջ դրեք մի տուփ մարգարին կամ մի կտոր հալած պանիր: Երաշտահավերը հեշտ
կգտնեն այդ համեղ կերակուրը:
Թռչունները սովորում են սենյակի մարդկանց, և մի
քանի օրից դուք կկարողանաք պատուհանից հետևել նրանց եռուզեռը ընդհամենը մի քանի
սանտիմետր հեռավորությունից: Երաշտահավերը հաճույքով ուտում են նաև հացի փշրանքներ
(սև և աշորայի հաց չի կարելի): Ավելի լավ է օգտագործել մանրացրած չոր հաց: Թարմ
հացը սառչում է ցրտին, և թռչունները չեն կարող ուտել այն: Ճնճղուկներն ու
աղավնիները նույնպես հաճույքով կուտեն հացը: Խածկտիկի և սերմնակեր այլ թռչունների
համար ամառվանից և աշնանից չորացնում են մոլախոտերի տրցակներ` սագախոտ, եղրևանի,
ձիու թրթնջուկ, կոթուկ և այլն: Կեռնեխների համար պահում են հատապտուղների
ողկույզներ: Դրանք հաճույքով ուտում են նաև խածկտիկները, սակայն, ի տարբերություն
նախորդ տեսակների, ուտում են ոչ թե հատապտուղը, այլ կորիզները: Ձմռանը քաղաքում
կուտամանի մոտ կտեսնեք այնպիսի անտառային բնակիչներ,ինչպիսին են սիտեղը,
փայտփորիկը, անտառային կաչաղակը: Սիտեղներն ու փայտփորիկները սնվում են
երաշտահավերի հետ միասին և հաճախ ընդհանուր երամներով են թռչում: Սիտեղները ուտում
են այն ամենը, ինչ երաշտահավերը, իսկ փայտփորիկներին հետաքրքրում է նախ և առաջ
կախված ճարպը, միսը և յուղի կտորները: Կաչաղակները նույնպես ուտում են ճարպ ու հաց:
Հատուկ նրանց համար սեպտեմբեր-հոկտեմբեր ամիսներից կարելի է կաղին պաշարել:
Կուտաման պատրաստելը դժվար չէ: Ամենապարզ տարբերակը կողերով տախտակն է ծայրերից
ամրացված, որպեսզի ուտելիքը քամին չտանի: Այդ նպատակի համար կարելի է օգտագործել
կաթի տուփեր, թիթեղե բանկաներ, ցանցապարկեր և այլն:
