Birds in My Backyard - Photo

Ինչպես լուսանկարել թռչուններին
Ձմռանը կերամանի մոտ թռչուններին նկարելն ավելի հեշտ է, քան ամռանն անտառում կամ տափաստանում, քանի որ հիմա նրանք ավելի շատ են վստահում մարդկանց:
Չնայած, նույնիսկ ձմռանը նրանք շատ զգույշ են: Այդ պատճառով խորհուրդ է տրվում նրանց նկարել թաքստոցից: Եթե կերամանը կախել եք Ձեր պատշգամբում, ապա թաքստոցը կարող է լինել Ձեր տունը: Այդ դեպքում որևէ բանով ծածկել պատուհանը և թողնել մի փոքրիկ անցք լուսանկարչական ապարատի օբյեկտիվի համար:
Եթե կերամանը կախել եք այգում, ապա հարկ է, որ նախօրոք հոգ տանեք թաքստոցի մասին, որտեղ թռչունները Ձեզ չեն կարող նկատել: Եթե այգում չկա հարմար տեղ, ապա փորձեք անել այնպես, որ թռչունները Ձեզ վստահեն: Դրա համար պետք է կանոնավոր կերպով գտնվել միևնույն վայրում, որպեսզի թռչունները Ձեզ սովորեն և բավական մոտենան: Կամաց-կամաց, մի քանի օրվա ընթացքում կարելի է մոտենալ կերամանին այնպես, որ լուսանկարելու պահին նրանք լինեն Ձեզանից ոչ հեռու:
Հիշեք որ, եթե ծրագրել եք այգում լուսանկարել, ստիպված եք լինելու երկար ժամանակ անշարժ նստել: Այդ պատճառով նախօրոք հարկ է հոգ տանել տաք հագուստի, ինչպես նաև, ցանկալի է, թերմոսով թեյի մասին: Բացի դրանից կարող է այնպես պատահել, որ կերամանի մոտ միառժամանակ ոչ մի թռչուն չլինի, հետևաբար, պետք է գտնել սպասումը հաճելի դարձնելու հնար (օրինակ` գիրք կարդալ): Բացի այդ պետք է իմանալ, թե ինչ ջերմաստիճանում է Ձեր ապարատը անխափան աշխատում, և համապատասխանաբար որոշել` որտեղ պահել ապարատը (օրինակ` վերարկուի տակ, և հանել միայն լուսանկարելիս):
Ցանկալի է լուսանկարել մոտեցման հնարավորություն ունեցող ապարատով, ինչի համար ցանկալի է օգտագործել 8-10 անգամ մոտեցնող օբյեկտիվ: Սակայն, եթե Ձեր ապարատի հնարավորությունը փոքր է (3 անգամ մոտեցնող), մի հուսահատվեք, միևնույնն է Ձեզ կհաջողվի բավական մոտենալ թռչուններին, եթե ունեք բավականաչափ համբերություն և մեծ ցանկություն:

Ահա մի քանի առաջարկություններ, որոնք կօգնեն Ձեզ գեղեցիկ լուսանկարել Ձեր թռչնին`

1. Համեմատաբար մեծ ֆոկուսային տարածություն թողեք, ինչպես նաև բավականին մեծ դիաֆրագմա (մոտավորապես 5,6), այնպես, որ լուսանկարի ֆոնը ֆոկուսից դուրս լինի:
2. Օգտագործե'ք չափազանց զգայուն լուսանկարչական ժապավեն (օրինակ` 400 միավոր): Այդպիսի ժապավենի համար առաջարկվում է ոչ պակաս քան 1/125 վայրկյան պահելու տևողություն:
3. Հնարավորին չափ բնական լուսավորություն օգտագործեք:
4. Եթե թռչնին լուսանկարում եք մեծավանդակում, դուրս հանեք բոլոր ճյուղերն ու թառերը, բացի այն ճյուղից, որի վրա մտադիր եք լուսանկարել Ձեր թռչնին:
5. Լուսանկարչական ապարատի եռոտանին տեղադրե՛ք նկարելու համար հարմար դիրքում: Օբյեկտիվը ուղղեք դեպի այն ճյուղը կամ կտամանը, որի վրա ցանկանում եք նկարել թռչնին: Թողեք լուսանկարչական ապարատը այդպիսի դիրքում` թռչնին հնարավորություն տալով համակերպվելու:
6. Փորձե՛ք հնարավորին չափ խոշոր պլանով լուսանկարել թռչնին:
7. Օգտագործե՛ք փականակի հեռակառավարման ձգանը կամ լուսանկարե՛ք թաքստոցից:
8. Փորձե՛ք կտրուկ շարժումներ չանել և չաղմկել:
9. Վայրի թռչուններ լուսանկարելու համար նրանց ուշադրությունը գրավե՛ք կտամանով: Այնուհետև հետևեք 5, 6, 7 և 8 կետերի առաջարկություններին:
10. Զինվե՛ք համբերությամբ: